«ANI PRODUCT» ընկերությունը հիմնադրվել է 2003թ․ Մկրտչյան ընտանիքի կողմից՝  նպատակ ունենալով կաթնամթերքի հայրենական շուկայում նոր խոսք ասել և նոր որակի արտադրանք առաջարկել։ Ու թեև ընկերությունն ուներ միայն փոքր արտադրամաս՝ իր առջև դրել էր բիզնես-երազանք` զարգանալ և խոշոր արտադրություն ունենալ։ Շուրջ վեց տարվա հետևողական աշխատանքի շնորհիվ հնարավոր եղավ մասշտաբային ներդրումներ կատարել։ Եվ արդեն 2009թ․ կառուցվեց նոր, միջազգային բոլոր չափորոշիչներին համապատասխան գործարան, ձեռք բերվեցին նորագույն տեխնոլոգիաներ, սարքավորումներ և հոսքագծեր։ Կարևորելով բնական ու բարձրորակ հումքը՝ ընկերությունը երկարաժամկետ պայմանագրեր կնքեց բարձր լեռնային գոտիներում գտնվող ֆերմաների հետ, որպեսզի նրանք ապահովեն անարատ կաթի հումքը: Բարձրակարգ արտադրանք ունենալու համար «ANI PRODUCT»-ի ղեկավարությունն իր շուրջ համախմբեց նաև ոլորտի առաջատար մասնագետներին։ Թիմը համալրվեց բարձր որակավորում ունեցող և արտասահմանում կրթություն ստացած լավագույն մասնագետներով, ինչը թույլ տվեց գործարանին քայլել ժամանակին և գիտությանը համընթաց: Հետևողական ու նպատակասլաց աշխատանքը շատ կարճ ժամանակում երազանքը դարձրեց իրականություն. «ANI PRODUCT»-ն իր ուրույն տեղը զբաղեցրեց շուկայում։ Տարեցտարի ընդլայնելով արտադրությունը՝ ընկերությունը բացեց նաև պաղպաղակի, զովացուցիչ ըմպելիքների և ջրի արտադրամասեր։ Այսօր «ANI PRODUCT» ընկերությունն իր հավատարիմ սպառողներին առաջարկում է բարձրորակ կաթ, մածուն, թթվասեր, կաթնաշոռ, քաղցրաշոռ, պաղպաղակ, մրգային համերով տարատեսակ զովացուցիչ ըմպելիքներ և աղբյուրի ջուր։